Wafanyabiashara ndogondogo kunufaika na Mikopo ya nyumba

Na Abdala Sifi WMJJWM- Dar Es Salaam

Katibu Mkuu wa Wizara ya Maendeleo ya Jamii, Jinsia, Wanawake na Makundi Maalum Dkt. John Jingu amekutana na Uongozi wa Benki ya Maendeleo kujadili namna ya kushirikiana na Wizara ili kutoa fursa ya mikopo kwa wafanyabiashara ndogondogo nchini.

Kikao hicho kimefanyika katika ofisi ndogo ya Wizara leo tarehe 28, Novemba, 2025, Jijini Dar Es Salaam.

Dkt.Jingu amepongeza uongozi wa Benki hiyo kwa kuonesha dhamira ya kuwasaidia wananchi na kusema kuwa Serikali kupitia Wizara ya Maendeleo ya Jamii, Jinsia, Wanawake na Makundi Maalum ndiyo yenye dhamana ya kuhudumia Makundi hayo hivyo ni wakati sahihi kuja na fursa hiyo kwa Maendeleo ya Jamiii.

“Milango ya Wizara ipo wazi kutoa ushirikiano na benki yenu kwa ajili kuhakikisha fursa hii ya mikopo inaratibiwa vizuri kwa manufaa ya wafanyabiashara ndogondogo”
amesema Dkt.Jingu.

Ameeleza kwamba ili kufanikisha fursa hiyo, kuna hitaji la kufanya makubaliano ya namna ya utekelezaji kwa lengo la kuhakikisha walengea wanafikiwa kikamilifu.

Kwa upande wake Meneja Usimamizi wa Fedha kutoka Benki ya Maendeleo Nolasco Charles amesema miongoni mwa fursa watakazopewa wafanyabiashara ndogondogo ni kukopeshwa nyumba, fedha pamoja na kupewa elimu ya kuendesha biashara zao kwa faida.

“Tumegundua kwamba wafanyabiashara ndogondogo wengi hawana nyumba na viwanja, hivyo kupitia fursa hii wataweza kukopeshwa nyumba au kiwanja na kulipa kidogo kidogo” amesema Nolasco.

Wizara ya Maendeleo ya Jamiii Jinsia Wanawake na Makundi Maalum kupitia programu mbalimbali inaendelea kuratibu na kuhamasisha jamii kuzijua fursa mbalimbali za kiuchumi na kuzitumia fursa hizo kwa maendeleo yao.

MWISHO